Era aparicion d'un nau libre en lengua nòsta ei tostemp un eveniment que cau celebrar e aplaudir. Era lengua a de besonh de forní-se damb literatura neishuda ben dirèctament deth hons, des parlants, d'òmes, hemnes, mainatges e joeni que son capaci de condar es vivéncies mès quotidianes e, a viatges, mès intimes, des sues existéncies damb eth lenguatge simple e propèr que balhe eth gust dera experiéncia compartida e coneishuda. Autant en forma de pròsa coma de poesia, se mos presente eth mon viscut, rebrembat e coneshut, mès tanben mons fantastics e imaginaris. E, en tant que mos i trobam e mos i reconeishem, mès gust i traparam e mès mos agradarà. Plan segur que mos identificaram coma lectors damb es autors e protagonistes d'aguestes istòries e poesies. Es bones estones en companhia d'ua bona lectura que son tostemp agradiues. Deishatz-vos donc, temptar!
